Rotas
Proposta de rotas cicloturistas do Concello de Mugardos
Pódense propoñer multitude de rotas polo Concello de Mugardos máis debido ao seu pequeno tamaño (12,7 Km² en superficie), resulta difícil non saírse do termo municipal para darlle un sentido turístico e paisaxístico de primeiro nivel. No seguinte documento propóñense dous trazados; o primeiro chamado o do Segaño e o segundo o do Seixo. O punto de partida de ambas rotas é a Casa do Reloxo. Neste edificio atópase a oficina de Turismo do Concello e está moi próximo á zona de atraque da Lancha de Mugardos.
Descripción do trazado primeiro ou «Segaño»
Saída da Casa do Reloxo no peirao de Mugardos, próximo ao punto de atraque da Lancha que fai o percorrido de Mugardos a Ferrol. Percórrese o paseo dirección ao Cantón de Cora desde onde ascendemos pola rúa Real á L-131(rúa do Peteiro) polo lugar das Mareas arrodeamos a enseada do Baño (enseada fermosa na que se atopa a praia da Bestarruza) primeiro nun descenso e logo nun ascenso á punta Redonda. No fin do rodeo á enseada do Baño chegamos ao fermoso lugar da Redonda, un miradoiro excelente de Mugardos e da súa praia da Bestarruza. Ao pasar a Redonda abandonamos as últimas vivendas do Concello para atoparnos co Castelo da Palma, unha impresionante fortificación militar orixinaria do S.XVI que controlou no seu día a boca da ría conxuntamente co Castelo ferrolá de San Felipe. Dende o Castelo imos paralelos ao mar xa en camiños de terra até a punta do Segaño (xa do concello de Ares) desde esta punta temos unha magnifica panorámica do océano Atlántico, da entrada da ría de Ferrol, do Porto Exterior e se fai bo día…até onde nos acade a vista. Neste punto percorremos 6 quilómetros, aquí temos a opción de voltar polo mesmo camiño de volta a Mugardos ou seguir dirección á enseada de Chanteiro onde atopamos una bonita praia recollida dos ventos. Desde aquí rodeando os montes de Montefaro e Bailadora polas parroquias aresanas de Chanteiro e Cervás para atacar o seu ascenso polos lugares de Monte, Sandei e Barra cara Roibeiras e a enseada do Baño xa en Mugardos. Aos 400m.de comezar o ascenso do Pazo das Condesas na L-131 tomamos un desvío á dereita que nos leva á igrexa de San Xiao de Mugardos e desde alí chegamos á rúa do Cristo e descendemos pola rúa Alta até a igrexa de San Telmo para seguir descendendo cara o peirao e completar os 13,408 quilómetros deste percorrido.
Descripción do trazado segundo ou «O Seixo»
Saída da Casa do Reloxo no peirao de Mugardos, próximo ao punto de atraque da Lancha que fai o percorrido de Mugardos a Ferrol. Percórrese o paseo dirección Cantón de Cora desde onde se ascende a AV. de Galiza cara o lugar do Penedo pola estrada do Seixo. Séguese esta estrada paralela á ría até chegar ao Seixo, pobo pequeno e fermoso que conta cun embarcadoiro e unha arquitectura mariñeira propia da zona. Deste lugar continuamos cara a igrexa de Franza e continuamos cara a estrada L-122 que cruzamos cara a capela da Ascensión xa na Parroquia de San Xoán de Piñeiro.Neste tramo existen numerosas arboredas que fan moi agradábel o paseo no verán. Desde este lugar dirixímonos cara Seselle e aos 300 m. tomamos a estrada de servizo paralela á vía rápida de Mugardos–Fene que nos deixa na rotonda de Franza desde a que imos á igrexa de San Vitorio. Chegado a este punto dirixímonos aos lugares de Rilo, Areosa e os Casás para descender á igrexa se San Vicente de Meá e volver ao peirao de Mugardos pola rúa Contramaestre Casado pasando polas Casas Baratas o Campo dos Carneiros e baixada á Casa do Reloxo. Este percorrido acada os 12208,05 Km. Sendo na súa meirande parte zonas interiores do concello. Os tramos son todos asfaltados pero a entrada en servizo da vía rápida que comunica Fene con Mugardos aliviará de tráfico estas estradas facendóas máis acaídas para as bicicletas.
